-
حرائـر غيمتي
(
http://www.emlaat.com/vb/forumdisplay.php?f=5)
عبد العزيز الجرّاح |
01/02/2010 11:59 AM |
يا صبحك اللي ابتدي به جديدي = لاسترسلت أنفاس صدري تعابير
يورق على أغصان صبحك قصيدي = لين ان من صبحك تغار العصافير
|
|
عبد العزيز الجرّاح |
10/02/2010 11:01 AM |
نامي على إحساس .. قلبٍ يحبّك = واصحي على إحساس .. عاشق جنونك
مدري علام الليل .. دايم يسبّك؟! = يمكن عشان الصبح .. نام بعيونك.!
|
|
عبد العزيز الجرّاح |
11/02/2010 03:30 PM |
كــل يــوم راسلـنـي .. عـلــى أوّل الـصـبـح=من قال فيها ازعاج.؟! وصلك ضروري
والله لـــو بـدلــت .. حــرفــك مــــع الــرمــح=لااقــول رمـحـك .. مــن دواعــي ســروري
|
|
عبد العزيز الجرّاح |
23/02/2010 04:38 AM |
جيت ارسم البسمة على شفتينك = وامسح دموعٍ من عيونك تناثر
وازرعك في صدري واعوّض سنينك = ويقوم حظٍ بالهوى كان عاثر
واهدره دمي لجل لحظة حنينك = ما عاد تفرق كان عمري تداثر
ليتك قريبه كان أقبل يدينك= وحبك بقلبي كل دقه يتكاثر
|
|
عبد العزيز الجرّاح |
12/03/2010 10:39 PM |
واتنفسك عطر .. ان تبخّر .. تبخّرت = لا تكسري في يوم .. قنينة العطر
|
|
عبد العزيز الجرّاح |
12/03/2010 10:42 PM |
من يوم غبتي والليال اتشابه ! =ولليوم مدري ليه كان ابتعادك ؟!
ليل وسهر وهموم ، ضيق وكآبه ! =حزن وأرق واوجاع جرح افتقادك !
|
|
عبد العزيز الجرّاح |
24/03/2010 03:10 AM |
أدري بأني أوحشك كل ساعه= واني على بالك ولو فيك ضيقه
وادري بعد تدرين فيني طماعه= يومٍ يمر بدون صوتك م.اطيقه
وادري بعد تدرين مر القطاعه = والحال من بعضه دقيقه، دقيقه
وتدرين عندي في غرامك مناعه = ماغيرك أحدٍ معه مني وثيقه
وادري بعد هالكون رغم اتساعه = مثلي فلا تلقين في هالخليقه
|
|
عبد العزيز الجرّاح |
28/03/2010 02:22 PM |
رفيق ليلي هالشعر، كيف أخليه ؟!=محدٍ يخلّي في الليالي رفيقه
هذا خويي دونه الليل م.اقضيه =مبطي وانا وياه خوّه وثيقه
وان كان يجفاني فلاني بجافيه = أشعر معاه طيور روحي طليقه
الشعر يحييني وانا دايم احييه= واتنفسه لا صار في الصدر ضيقه
م.اذكر عصاني لو صعيبه قوافيه = كل ما ندهته صوبي يعرف طريقه
مجنون شعر واعشقه حيل واغليه= وحرفٍ كتبته صعب يخفت بريقه
|
|
عبد العزيز الجرّاح |
28/03/2010 02:23 PM |
جيتي بدربي لين صرتي بقلبي = صدفه وتسوى بالهوى ألف موعد
في حين غيرك يحلم بيوم قربي= شرّعت لك بابٍ له اسنين موصد
|
|
عبد العزيز الجرّاح |
29/03/2010 02:32 PM |
وافتقدني عشق والقاني وحيد = في غياهب ليلتينٍ غيّبتك
واتساءل ليه تبقيني بعيد؟ = خايف الأيام بعدي عذّبتك
هذي الأشواق تكتبني قصيد= وادري انها شيبتبي وشيّبتك
|
|
عبد العزيز الجرّاح |
16/04/2010 01:01 AM |
مرّت عليّ اسنين حزن ومصايب = من قبل تشرق في صباحي صباحي
الهم في قلبي كتايب ، كتايب= من زود حزني اقضي الليل صاحي
واليوم جيت تحث سير الركايب = لين ان نورك شّع واطلق سراحي
أنت الحبيب اللي له اسنين غايب = اللي معه والله تبرى جراحي
لا ياحبيب الروح سيد الحبايب = بعدك عناي وجيت معك ارتياحي
|
|
عبد العزيز الجرّاح |
17/05/2010 07:39 PM |
مجنون هذا الصبح سبّة جنوني = حتى توافق مع جنوني جنونك
كثر الرسايل ما يشبّع شجوني = وادري فلا والله يوصف شجونك
الحب أسمى من قوافي فنوني = وارقى وأسمى من بيادر فنونك
الحب نعمة تنتخي قدروني = الله يحفظ ناسٍ يقدرونك
ودي عيونك لا ضمت يشربوني = لنّه عيوني لا ضمت يشربونك
ماغيرك أحدٍ إيه يملا عيوني = وادري بأني غيرهم في عيونك
يوم اتصالي من دوافع جنوني = جاني اتصالك من دوافع جنونك
|
|
عبد العزيز الجرّاح |
25/06/2010 01:37 AM |
بيني وبين الصبح عهد ومواثيق = ما نام انا ليلي ولا الصبح يبطي
ما دام فيني من الحزن فوق ماطيق = سود الليال من المواجيع حطي
|
|
عبد العزيز الجرّاح |
07/07/2010 01:32 PM |
ارتعش هالقلب من صوتٍ حنون = لين روحي لك خلتني وراحت
وجيتلك تايه وأنا قلب وعيون = وابتسامة جمرتين التوت لاحت
وامتزج عطرك مع انفاسك دخون = لين والله شمعتين الشوق ساحت
ويش أسوّي بي وانا كلي جنون؟! = اعذريني لو عزوم الصبر طاحت
لا تلوميني وأنا اشوفك فتون = لو شفاتي كل ما فيك استباحت
يالله اخذيني على عذب المزون = ياجنوني لو شربت أنفاس فاحت
|
|
عبد العزيز الجرّاح |
10/07/2010 03:36 PM |
ودي اجمع مع جنوني جنونك = ودي اوصل معك شي ٍ ما وصلته
ودي آخذني واقدمني لعيونك = وتعرفين اللي لك بقلبي حملته
ما أعيش العمر بعد اليوم دونك = والله ان العمر فدوالك جعلته
قولي لصوتك على "الجرّاح" هونك = لا تقول الناس إن انتَ قتلته
|
|
عبد العزيز الجرّاح |
22/07/2010 04:28 PM |
قبـل امـل الشـعـر وازهــق منْه جيتي = جيتـي وانتِ مُلهمـه بكـل المواسـم
جيتي نورٍ يشعل الشعر و ضويتي = جهزي للشعر في الصبح المراسم
|
|
عبد العزيز الجرّاح |
22/07/2010 04:29 PM |
ياخذ صباحي نكهتـه مـن توتـك=ويفـقـد مسـائـي روعـتـه بغـيـابـك
مابيـه صبـحٍ مـا يجيبـه صـوتـك=م.اسهره ليلٍ ما تجي واحضابك
|
|
عبد العزيز الجرّاح |
25/07/2010 12:56 AM |
ظميتك كثر ما صوتك .. شربته ليلة البارح =ظميتك كثر ما كنتِ .. بعيده والأمل مفقود
ظميتك إيه يا حلمٍ .. يعيش بفكري السارح =ظميتك كثر ما ودّي .. اشوفك واقعٍ مشهود
ظميتك ما قويت أنكر .. وأكون لخافقي جارح =ظميتك لو شعوري لك .. تحسينه معك محدود
|
|
عبد العزيز الجرّاح |
26/07/2010 09:29 AM |
شلال شعره فوق متنه تنثّر= ليلٍ عرف مقدار هيبة نهاره
يا ويل قلبي كان حظي تعثّر= ان كان ماشفته ولا جيت داره
الدم والله بالعروق يتخثّر= والشوق يشعل بالمعاليق ناره
|
|
عبد العزيز الجرّاح |
26/07/2010 10:50 PM |
صدري تشرّب حزن يومي وليلي= وانقطعت انفاسي وانا حيل مخنوق
والهم قيّدني ولا اطلق سبيلي = كنّي خصيمه ولاانا منْه مخلوق
ياويل حالي ، ويل ويلي و ويلي= عظيم حزني ذوّب عيون وعروق
|
|
عبد العزيز الجرّاح |
28/07/2010 12:20 AM |
حي صوتٍ لا لفى يروي اعروقي =يوم جفّت من غيابه ما جفيته
يوم غاب ولا شعرها نار شوقي = ذلك اللي بآخر اعماقي نفيته
حي صوتٍ صاحبه يسكن خفوقي = كم سهرته في غيابه ما غفيته
كان جاني ياحروف الشعر روقي = واظهري له اعذب اللي له خفيته
|
|
عبد العزيز الجرّاح |
01/08/2010 01:04 AM |
تشبهين الغيم ياهمس الغمام = والبياض اللي كسى صدر الشمال
والعطر والورد يا طهر الأنام = والصبح والنور والماء الزلال
من يحبّك والله انه ما يلام = لو يخون النّسا لجلك حلال
من تغيبي على الدنيا السلام = وان حضرتي صارت الدنيا عدال
|
|
عبد العزيز الجرّاح |
01/08/2010 03:46 PM |
صباحك نور ،
مثل فجرٍ صحى توّه وشّع النور
صباحك نور،
مثل غيمٍ سقى ورد وغدى ممطور
صباحك نور ،
مثل وردٍ صحيتي بغرفتك منثور
صباحك نور،
مثل ( ميمه) تفيق و توقد التنور
صباحك نور ،
مثل بسمة طفل توّه يجي للنور
صباحك نور ..
|
عبد العزيز الجرّاح |
10/08/2010 02:44 AM |
حظ الرياض بجيّتك والشوارع = كل المدينه لا وصلتي بساتين
وحظ العيون الساهره والمدامع = وحظ العروق الضاميه والشرايين
وحظ الكفوف بلمستك والمسامع = في همستك يافتنة القلب والعين
ان كان قلبك من شقا البعد جازع = أنا لك بقلبي غرام المجانين
لكن غير الشوف مالي مطامع = لو يشره الرمان والورد والتين
|
|
عبد العزيز الجرّاح |
29/08/2010 11:33 AM |
وين صوتٍ هزّني لامن سمعته؟ = يوم عنّي غاب، واظماني غيابه
لو سهرته طول ليلي ما شبعته = والله ان الليل من بعده كآبه
|
|
عبد العزيز الجرّاح |
11/10/2010 09:33 PM |
10 / 10 / 2010م
في عشره عشره عام عشره وألفين = بأكد إنك حلم قلبٍ يحبّك
ما هانت العشره ولو غبتي سنين = ولا مات حبٍ في عروقي يصبّك
|
|
عبد العزيز الجرّاح |
20/10/2010 11:52 PM |
وينه اللي كل ما ضاقت يخليها وسيعه.؟! = واستظل بفي صوته يوم تتدلّى عذوقه
صاحبٍ ل.امطر سحابه يزهر بصدري ربيعه = لين يورق في خفوقي كل غصنٍ من عروقه
صاحبٍ لا غاب عني ليلتي دونه شنيعه.! = كيف يحسبني اتجاهل جيته وانكر حقوقه؟!
أدري اني عشق روحه ، يدري اني ما أبيعه = مثل ماهو في خفوقي ، مثل ماني في خفوقه
ليت لي حظ يحضابه صاحب الطلّه البديعه = ويهتني عشقي وشوقي واهتني عشقه وشوقه
|
|
عبد العزيز الجرّاح |
30/10/2010 02:25 AM |
ما بالنهار اللي ورى طلعة النور = روحٍ لها خاطر فبعدك تعيشه
والصبح من دونك من الضّي مهجور= وش لي بصبحٍ معك ماعيش طيشه
كن العمر بعدك على الوصل مقصور= وكل الأماكن في غيابك وحيشه
|
|
عبد العزيز الجرّاح |
02/11/2010 11:25 PM |
يا كثر مالك في قصيدي سيره = لو كان ماهي ترتقي لعناقك
من يوم حبّك والقصايد ديره = انتِ ملكها ماتطيق فراقك
|
|
عبد العزيز الجرّاح |
10/11/2010 10:03 PM |
كان الوصل حلمٍ تعايش مع الذات = واليوم أصبح في حياتي حقيقه
ودامٍ قطعنا في هوانا مسافات = واجب علينا اليوم نكمل طريقه
لن الغياب تضيق فيه الفضاءات = عجزت لـ.اقدر ياحبيبه أطيقه
|
|
عبد العزيز الجرّاح |
04/12/2010 09:16 AM |
ياحلم عمري ، يابعد كل ناسي= أنا بدونك ياغلا الروح من لي؟
يا كثر ودّي تنتهي هالمآسي=ويفرح خفوقٍ في وصالك يهلي
محدٍ شبيهك بالغلا أو يواسي= ولا غيرك أحدٍ بالمخاليق خلي
انتي مكانك فوق شم الرواسي = واموت لو غيري يحل ابمحلي
للموت أحبك لو كسرتيه باسي = يا أجمل اللي في حياتي حصلي
فديت روحك يابعد كل ناسي = فديت كلّك يا بعد كل كلي
|
|
عبد العزيز الجرّاح |
08/12/2010 09:58 AM |
لحظة سؤالك تنتشي روح غاليك = ويفز قلبه من ضلوعه يلبّي
أهلًا حبيبي اسعد الله لياليك = وحشتني واشتاقلك حيل قلبي
|
|
عبد العزيز الجرّاح |
11/12/2010 02:38 AM |
أحبك .. كثر ما ينبض .. خفوقٍ صار مجنونك= أحبك .. كثر ما تسهر .. عيونٍ تحلم بشوفك
أحبك .. كثر ما قلتي : حبيبي وقلت : يا عونك = أحبك .. كثر ما قلبي .. عليك يخاف ويطوفك
أحبك .. كثر ما ودي .. أوقف للحزن دونك =أحبك .. كثر ما ودك .. أجيك وأنزعه خوفك
أحبك .. كثر ما فجري .. تنفس واكتسى لونك= أحبك .. كثر ما عطرك .. عشقها راحة كفوفك
|
|
عبد العزيز الجرّاح |
12/12/2010 11:56 AM |
مانام ليل اليآس، صاحي عشاني !=لبّس سواده وجه كـل المعانـي !
عامين وآنا كـل ليلـه اعانـي !=واسهره وحدي وانا عازف الناي !
|
|
عبد العزيز الجرّاح |
15/01/2011 09:23 AM |
بنتٍ تطالع للسما ينهمر ديم = ثم تبتسم للأرض تزهر نواوير
يسعد صباحٍ جابها جنّة الغيم = وش عاد أجمل منه صبح التباشير
|
|
عبد العزيز الجرّاح |
17/01/2011 02:16 PM |
ودي أسولف للمسا عن غيابي != واقول : فاقدني وانا بين ناسي !
يا كيف أجمّل فيك حرف انسكابي ؟= لا صار ضيقي ممتلي فيه كاسي !
|
|
عبد العزيز الجرّاح |
22/01/2011 10:41 PM |
يغرس حضورك بالعيون ابتسامه = وتنبت سنابل فرحتي في حروفي
لكن صبحك ماعطاني علامه ! =أردم بها فيني مواريد خوفي
|
|
عبد العزيز الجرّاح |
07/02/2011 02:03 AM |
يسعد صباح اللي صباحه أسرني = اللي له حروفي مع الصبح تنساق
وإليا حصل في يوم ظرفي عثرني = م.ارسلت تصبيحه ولا ارسلت الاشواق
ألومني لو كان خلي عذرني = وشلون راح الصبح ما قلت مشتاق؟!
|
|
عبد العزيز الجرّاح |
05/03/2011 02:52 PM |
رسالة :)
تصدقين.؟
لو تجيني منْك هاللحظه
رسالة !
وآنا داله !
يمكن أني من العجاله !
با تلعثم !
واكتب اني فيْك افكّر :)
وانسى إني قلت :
داله ;)
شوفي فيني وش تسوّي !
لو تجيني بس رسالة .!
صدقيني ،
حالتي وياك حاله !
|
عبد العزيز الجرّاح |
21/03/2011 10:58 PM |
من ودّه يغنّي ويعزف مع الجرح؟!= من ودّه يساهر عيوني واساهره؟
من ودّه يقاسم أحاسيسي الترح؟! =ويكون لي ملهم وانا اكون شاعره
|
|
Powered by vBulletin® Version 3.8.8 Beta 1
Copyright ©2000 - 2024, Jelsoft Enterprises Ltd.
3y vBSmart
جميع الحقوق محفوظة لـ منتديات إملاءات المطر الأدبية - الآراء المطروحة في المنتدى تمثل وجهة نظر أصحابها